lunes, 27 de junio de 2016

TRABAYU INFANTIL



El Fuero del Trabajo (copia de la italiana Carta del Lavoro) de 1939 permitía'l trabayu dende los 14 años. Nel mundu rural, onde vivía la mayoría de la población, la realidá yera tovía más dura, yá que los nenos tenién que collaborar dende mui pequenos cola xera del campu. Nesti casu tenemos una semeya de La Felguera de 1954, onde vemos a un rapacín de catorce años trabayando d'aprendiz nuna imprenta, llabor polo demás mui común nuna comarca como la del Nalón, d'amplia tradición industrial.

(foto cedida por Ángela González)



jueves, 16 de junio de 2016

EN MOTO




La motocicleta, hasta la xeneralización del automóvil a lo primero de los años ’70, yera un símbolu de status ente los xóvenes de les clases populares asturianes. Ye un clásicu nos álbumes familiares la tradicional fotografía d'un pariente nos sos años mozos posando arguyosu montando una máquina que simbolizaba la independencia, tanto de movimientos como económica. Tovía mui rares nos años ’50, que ye cuando se garró la primera de les semeyes, empiecen a abundar nos años ’60 ente los xóvenes a partir de la década de los ’60, cuando'l desarrollismu industrial franquista y les movilizaciones obreres xeneren una clase trabayadora con un nivel de renta abondu como pa permitirse mercar la popular Vespa y arrequexar la bicicleta. Les dos imaxes son del conceyu de Samartín del Rei Aurelio. La primera ye d'una fecha indeterminada de la década de los años '50 y la segunda con bastante probabilidá de 1964.


(Semeyes cedíes por Yudani garcía)

martes, 14 de junio de 2016

LES BODES



Les bodes na Asturies de la dictadura, igual que nel restu d'España, namás podíen ser d'una manera: col ritu católicu. Anque formalmente nun taben prohibíes les bodes civiles, que yá existín nel país dende la monarquía d'Alfonso XIII (1902-31) y qu'esporpollaron de forma bultable nos años de la II República (1931-39), la presión social y el mieu a les represalies fixeron que nos años del franquismu les bodes católiques volvieren a garrar tol protagonismu.

 Les diferencies ente unes bodes y otres, a lo llargo de cuarenta años, nun van ser asina pol ritu col que se faen sinón pol gastu qu'impliquen. Tenemos equí dos bodes feches na mesma villa, Sotrondio, en dos momentos mui concretos: una sobre l'añu 1939 o 1940, tando acabante la guerra civil y en plena escasez, y otra a lo primero de la década de los '60, cuando'l despegue industrial d'Asturies permite a la clase trabayadora volver a celebrar bodes de les de “tirar la casa pela ventana”.


(semeyes cedíes por Yudani García y Celia Pandiella)