domingo, 25 de septiembre de 2016

APERTURA

La muerte del dictador el 20 de payares de 1977 nun supunxo por sí mesma'l fin de la dictadura, anque nos meses siguientes los gobiernos de la monarquía entamaron un procesu d'apertura política que llevaría en 1977 a la convocatoria d'elecciones pluripartidistes por vez primera dende 1936. Esti procesu coexistió con fuertes movilizaciones sociales desixendo l'amnistía de los presos políticos y el reconocimientu de les llibertaes sindicales y polítiques elementales. Les semeyes que tenemos equí son del Día de la Cultura, cita emblemática de la esquierda asturiana, que se celebró tolos meses d'agostu de 1972 a 1984, y que yera una especie de romería laica onde, tovía baxo la dictadura, se celebraba un actu de mases de la oposición antifranquista. Les imáxenes qu'apurrimos son concretamente de 1976, la primera depués de la muerte del dictador, pero cola dictadura tovía mui viva, onde vemos banderes daquella tovía prohibíes, como la tricolor republicana, les de los partíos de la oposición o les pancartes de los sindicatos tovía clandestinos.




(Semeyes cedíes por Yaiza de los Bueis)

martes, 20 de septiembre de 2016

MODERNIDAES NAVIDIEGUES


L'árbol de Navidá, importáu d'Alemaña vía Gran Bretaña pola burguesía española nes postreres décades del sieglu XIX, nun llega a tener una dimensión de mases n'Asturies hasta mui avanzada la década de los años '60, cuando'l poder alquisitivu  de la clase trabayadora permite esi tipu de gastos decorativos, coexistiendo polo demás col tradicional belén, importáu de Nápoles yá nel sieglu XVIII. Equí tenemos un árbol de Navidá en sotrondio en 1967.


(semeya cedida por Laura Vallina)

miércoles, 14 de septiembre de 2016

DE LA ESCUELA A LA MINA














Había comarques n'Asturies onde'l cursu vital paecía predetermináu con una precisión tremenda. Nesti casu, yera mui común que los mozos de Les Cuenques, n'acabando la escuela, entrasen na mina a trabayar.
 Equí vemos dos momentos de la vida de la mesma persona: la típica semeya escolar de la España franquista, col mapa a lo fondero de la imaxe, fecha en L'Entregu en 1962, y venti años depués, en 1982, col mesmu protagonista, trabayando na mina nel Pozu Fondón.


(Semeyes cedíes por Héctor Gómez)

lunes, 12 de septiembre de 2016

REPRESIÓN





La represión d'una dictadura tan llarga y feroz como la franquista coexistía con toles facetes de la vida cotidiana. Anque les execuciones masives pararon nos años '40, hasta l'amnistía de 1977 hubo miles de presos políticos como'l que tenemos nesta semeya, Francisco Ramírez, veteranu miltante comunista de Llangréu qu'apaez equí coles sos fíes y l'uniforme de presu nuna visita que-y fixo la so familia a la cárcel de Burgos en 1960.



(Semeya cedida por Yaiza de los Bueis)

jueves, 1 de septiembre de 2016

COMUNIONES: DEL CONVENTU A LA BODA



La evolución estética de les primeres comuniones ye una constante a lo llargo del sieglu XX. Si nes primeres décades les contrayentes, sobre too les nenes, paecen dir vistíes como aspirantes a monxa,
na década de los '60 empieza a imponese una estética nel traxe de primera comunión femenín que remite dafechu al de la novia nel día de la boda. Equí tenemos tres semeyes: una comunión en L'Entregu hacia l'añu 1963 o 1964, otra en Barredos posiblemente a lo postrero de los años '60, y otra en Lada nel añu 1979 o 1980.


(Semeyes cedíes por Yudani García, Marta fernández y Ángela González)